Sonia Fidalgo.
Aragón vien funcionando dende hai décades como un territoriu de prueba, un espaciu onde s’anticipen tensiones que dempués s’estienden al conxuntu del país. Nun ye casualidá que ellí se vea con especial claridá un fenómenu que güei atraviesa a munches democracies: l’ascensu de la estrema derecha nun contestu d’agotamientu social, empobrecimientu del debate públicu y abandonu de la pedagoxía política.
Va a años que nun s’esplics pa qué sirve la política algo que nun tien un resultáu neutru. Nel vacíu que dexó’l pensamientu críticu prosperaron los mensaxes más básicos, emocionales y simplificaos. El populismu nun naz de la nada: aliméntase d’una ciudadanía cansada, desorientada y empurrada a entender la realidá en clave d’enemigos y soluciones milagru.
La fotografía social ye conocida. Una clase obrera precarizada, atrapada na inseguridá vital, y una clase media que dexó de reconocese como tal. Ensin rede, ensin horizonte y ensin espectatives, el mieu conviértese nuna ferramienta política de primer orde. Nesi terrén triunfen los que dicen tener la capacidá de “crear trabayu” al tiempu que señalen culpables fáciles y ataquen a los que gobiernen, a les instituciones y, en última instancia, a la mesma democracia.
Equí ye onde la estrema derecha dexa de ser una opción más pa demostrar lo que ye de verdá: un proyeutu de regresión democrática. Estés fuerces llograron daqué fundamental pal so avance: presentase como normalidá, cubrirse cola piel del sentíu común y falar el llinguaxe de la institucionalidá mentanto cuestionen los fundamentos mesmos del sistema democráticu.
El peligru nun ye abstractu. Ye concretu y midible en derechos.
Cuando se fala del derechu de les muyeres a decidir sobre’l so propiu cuerpu, la extrema derecha propón quitar esa capacidá de decisión y devolvela al control moral y estatal. La autonomía personal dexa de ser un derechu pa convertise nuna tutela. Frente a esto, la izquierda democrática defiende el derechu a decidir como parte inseparable de la llibertá individual, la igualdá xurídica y la salú pública. Dos concepciones opuestes de ciudadanía: tutela frente a autonomía.
Na llibertá de cultu y de conciencia, la estrema derecha defende una identidá nacional homoxénea, onde delles creencies son aceptables y otres sospechoses. La llibertá relixosa rebáxase a una tolerancia condicionada. La izquierda democrática pel contrariu, defende un Estáu aconfesional onde creer, nun creer o creer distinto ye un derechu individual plenu, non un privilexu cultural.
La igualdá d’oportunidaes marca otra llinia de fractura. La extrema derecha niega l’esistencia de desigualdaes estructurales y reduz la igualdá a una ficción meritocrática que llexitima que l’orixe social determine’l destín vital. La desigualdá naturalízase. Frente a ello, la izquierda democrática sostién que ensin polítiques públiques redistributives nun esiste igualdá real, y que l’Estáu tien la responsabilidá de corrixir les breches que’l mercáu fonda.
Nel ámbitu de la violencia contra les muyeres, la estrema derecha niega’l so calter estructural y dilúi’l problema nuna violencia xenérica. El resultáu ye menos protección, menos recursos y más desamparu. La izquierda democrática defiende que nomar la violencia machista ye condición imprescindible pa combatila y pa protexer vides.
Lo mesmo asocede colos derechos LGTBI. La extrema derecha considéralos ideoloxía, esto ye, derechos revocables. La izquierda democrática entiéndelos como parte del progresu democráticu y de la igualdá ante la llei. Pa unos, la diversidá ye una amenaza; pa otros, un derechu protexíu.
El patrón ye inequívocu. La estrema derecha nun llega al poder pa meyorar la democracia, sinón pa redefinila a la baxa. Nun deroga derechos d’un golpe: cuestionaos, relativízaos, conviértelos en opinables. El llobu nun ataca de frente; desgasta la estructura mentanto sorríe. Mantién les formes, pero vacía’l conteníu.
El mayor riesgu nun ta solo en que la estrema derecha gobierne, sinón en que’l so marcu mental se normalice. Cuando l’autoritarismu se disfraza de sentíu común, cuando la desigualdá se xustifica como orde natural, cuando los derechos se presenten como privilexos, la democracia entama a perder defenses ensin necesidá d’un golpe.
Ellí onde s’abandona la pedagoxía política, onde se renuncia a disputar el rellatu y a esplicar que la política ye la única ferramienta colectiva pa ampliar llibertaes, l’espaciu ocuparlo quien promete soluciones simples a problemes dificiles. Y eses soluciones, históricamente, siempres acaben pasando factura.
Quitar la piel de corderu al llobu nun ye retórica: ye una obligación democrática. Pero güei, amás, hai que dicir daqué más incómodu: los anti demócratas yá nun se esconden.
La estrema derecha grita, saca pecho de selo y presume d’un autoritarismu que antes se disimulaba.
Defender la democracia nun ye odiar, ye cuidar. Nun ye crispar, ye recordar. Ye saber que los derechos nun son regalos, sinón conquistes colectives, y que solo se pierden cuando se dexen de defender.
Dende esi llugar de conciencia tranquila, ensin mieu y ensin estrépitu, pue dicise con claridá: la estrema derecha amenaza el suelu común que fai posible vivir xuntos en llibertá. Y cuidalu, con firmeza y con calmu, ye la meyor forma de protexenos a toos.